Bílastæðið fyrir framan eina bygginguna var girt af og löggur út um allt. Forbes Ave var lokuð af að stórum hluta, blikkandi ljós út um allt og fréttaþyrlur í loftinu. Einhver asnaðist til að leggja bíl þar sem má ekki leggja, skilja hann eftir í klukkustund með furðulegan vökva í bílnum. Eitthvað leist mönnum ekki á blikuna og kölluðu á lögregluna sem ræsti út sprengjudeildina.

Við sáum einn klæðast svona sprengjubúningi og labba upp að bílnum og pota í hann eða eitthvað. Alveg eins og í CSI:Miami, nema hvað að þetta tók miklu lengri tíma og ekkert gerðist. Ég hef grun um að þeir séu eitthvað að stytta þetta í sjónvarpinu, því það tók hann 10 mín að koma sér í búninginn.

Á morgun verður svo haldið til stórborgarinnar Lincoln í Nebraska, en þar ku víst landið vera flatt eins og pönnukaka. Hver veit nema ég taki myndir.